Elamî bi hunerê xwe yê verotinê navdar in. Gelek berhemên bi vî rengî ji beriya bi 3 hezar salan nexasim jî ji deverên dewrûbera Şûşê (Sûsaya antîk) yanî paytext Elamiyan mane, lê navê welatê wan di metnên ji hezarsala 4’an beriya mîladê de jî hatiye hildan. Wan ji xwe re He(l)temtî gotiye û Sumeriyan jî hem ji wan re û hem jî ji welatê Zagrosan hemûyî re gotiye, NIM (bilind) yan jî NIM-MA-ki. Lê di vê rolyefa hanê de em gelek tiştan bi hev re dibînin: Têşîrêseke li ser kursiyekî rûniştî, maseyeke ku li ser masiyek li ser tepsikekê hatiye danîn. Detayên nexşên cilûbergên jinê, yên teşiyê û xemla lingên mase û kursî hemû xuya ne, heta bi girêdana porê wê. Jina teşîrês li ser lingên xwe rûniştiye û binê lingê wê yê li mirov dinihêre jî bi tefsîlat xuya ye. Ev kevirê verotî li paytexta Elamiyan Şûşê hatiye dîtin û ji sedsala 8’an beriya mîladê maye. Li ser keviran verotî teşîrêsên kevintir jî hene, lê ev yek ji wan e ku girtina teşiyê û rûniştina teşîrêsê gelekî realîst û bi hosteyî hatine verotin.
NAVENDA NÛÇEYAN
